اخبار شقندحية
الاربعاء 19 تشرين الثاني 2008
لا تدوخونه!!
الخبر:
قال عضو مجلس النواب عن جبهة الحوار محمد الدايني ان الطرف الوحيد المستفيد من هذه الاتفاقية هو الجانب الايراني، ويأتي بعده الجانب الأمريكي.
التعليق:
لعد اذا أنت تشوف أنه الجانب العراقي ما اله خبزة بالاتفاقية وفايدتها بس لأمريكا وايران ليش ما قنعت رئيس جبهتك صالح المطلك وصفيتولكم على راي واحد..مو أنت تشر الاتفاقية على الحبل منا..ومناك صاحبك يمدحها..غير تتفقون على موقف واحد حتى الناس لا تدوخ بيناتكم!!!.
مسكين يلماعندك حزب!!
الخبر:
قال رئيس لجنة النزاهة صباح الساعدي إن 120 نائبا من كتل سياسية مختلفة قدموا طلبا لهيئة الرئاسة تطالب باستجواب وزير النقل عامر عبد الجبار لاستخفافه بالسلطة التشريعية وعدم مجيئه لجلسات مجلس النواب وسوء أداء وزارته.وأضاف الساعدي أن رئيس مجلس النواب محمود المشهداني قال بالجلسة إنه في حال عدم مجيئه بعد سبعة أيام سيتم نزع الثفة عنه.
التعليق:
ما دام هذا الوزير مستقل وما عنده كتلة ولا حزب يلزمون ظهره راح تطبق براسه كل القوانين والنواب يسوون علي شدة يا ورد ويستعرضون عضلاتهم براسه..بس نسو أنه وزير التجارة هم لبسهم جم مرة وما حضر للبرلمان..وعن سوء الاداء فحدث ولا حرج بسوء اداء عبد الفلاح السوداني..بس محد كدر يحاجي ولا يسويله شي لأن عنده ( ظهر )..وصدك لو كالو ( كوم بحزب وأكعد بحزب .. ومسكين يلماعندك حزب )!!!.
خليها سكته يلفتة!!
الخبر:
وصف وزير الإعلام السوري محسن بلال الاتفاقية الأمنية بين بغداد وواشنطن بأنها مكافأة للمحتل، مضيفاً: إننا لا يجب أن نكافيء المحتلين بإعطائهم جائزة.
التعليق:
صحيح والله كلامك يا بلال..لازم ما ننطي للـ ( محتلين ) جائزة..بس يصير ننطيهم الجولان عطيه ما من وراها جزيه..خليها سكته يا لفته!!!.
سليمة وسعدية والأقليم!!
الخبر:
رفض المجلس الأعلى الإسلامي تشكيل إقليم البصرة، متهما النائب عبد اللطيف بإتباع طرق غير سليمة لجمع تواقيع طلب تشكيل الإقليم.
التعليق:
المجلس الأعلى كام يدور طرق سليمة وأوضاع سعدية لأن طلع شريك جديد راح ينافسهم على الأقليم الموعود..بس كبل لا يطلعلهم وائل عبد اللطيف جانت صنته ومغلسين على الموضوع وما يجيبون طاري للطرق السليمة والمو سليمة!!!.
حانة الاتفاقية ومانة القانون!!
الخبر:
أعلن عضو مجلس النواب عن الحزب الشيوعي مفيد الجزائري ان عدد من النواب طالبوا بتشريع قانون خاص بالاتفاقيات الخارجية.
التعليق:
هذا القانون هم ما راح يفض الشغلة ولا يسوي حل للاتفاقية الأمنية الحالية..لأن الي معارضيها هسه ما راح يوافقون على تشريع القانون اذا ما يخلون بي شغلات تضمنلهم عرقلة الاتفاقية..والمؤيدين للاتفاقية يريدون يخلون نقاط تمشيها..وراح نبقى بين حانة الاتفاقية ومانة القانون!!!.
تفائل بالخير يا صولاغ!!
الخبر:
قال وزير المالية إلى ان الحكومة الاتحادية قد تضطر إلى اتخاذ ما وصفه بإجراءات مؤلمة عند احتساب ميزانية عام 2010 اذا ما استمرت اسعار النفط على مستويات تدهورها الحالية.
التعليق:
بعدنه احنه وين و2010 وين وأنت مسبكلنه من هسه ومتشائم..لو زادت اسعار النفط تغلس ولا تجيبلها طاري..بس بالهبوط تحسب حساب اليهود وكبل سنتين تحد سنونك علينه..تفائل بالخير يا صولاغ!!!.
ما يمكم غير العافية!!
الخبر:
قالت مصادر عراقية من مجلس ان عددا من اعضاء مجلس النواب من مختلف الكتل غادروا العراق تحت ذرائع مختلفة منها صحية او قضاء اعمال تجنبا للتصويت على الاتفاقية الامنية.
التعليق:
هاي شطلعت ويه النواب..رئاسة البرلمان لغت كل الاجازات والايفادات وبقت بس الاجازات المرضية حتى لحد يغيب..أنوب نوابنا الأعزاء كلهم مرضو روحهم حتى لا يحضرون..وبعدين اذا انقرت الاتفاقية يكومون يصرحون من الخارج ويكولون ما اخذو رأينه وما استشارونه!!!.
الثلاثاء 18 تشرين الثاني 2008
مزاج السيد البارزاني!!
الخبر:
اعتبر رئيس إقليم كردستان مسعود البارزاني ان العناصر الذين ينضوون تحت لواء مجالس الاسناد المشكلة في المناطق المتنازع عليها (خونة) وسنعاملهم كقوة معادية. وفي حال استمرار تشكيل المجالس الإسناد فأنه سيكون هنالك مواجهة.
التعليق:
كاكه مسعود بلسانه جاي يكول ( مناطق متنازع عليها )..يعني ما تابعة للأقليم..وبعدين ليش السيد البارزاني يوافق بوجود البيشمركة بهاي المناطق وما يوافق على وجود مجالس الاسناد المشكلة من أهالي المناطق..لو مسعود يفصل بكيفه!!!.
شيريد والي حي العدل؟!
الخبر:
صرح رئيس جبهة التوافق عدنان الدليمي ان الجبهة متحفظة على فقرة موجودة في الاتفاقية الامنية، حيث كنا قد طالبنا بان يتم اطلاق سراح المعتقلين في السجون الامريكية بدون قيد او شرط ، لا ان يطلق المعتقلون من السجون الامريكية ويذهبون الى السجون العراقية.
التعليق:
لعد شيريد الهزاز..جنابه الكسيف يريد يهدون المعتقلين الي بينهم ارهابيين وذباحين مثل الجلاب المسعورة على الشعب العراقي..حتى نرجع من جديد لنطقة الصفر وترجع أيام التفخيخ والقتل على الهوية..الظاهر هي هاي الي يريدها والي امارة حي العدل عدنان بن سلمان الدليمي!!!.
وائل عبد اللطيف ونصيحة بيبيته!!
الخبر:
قال النائب وائل عبد اللطيف ان الحكومة الكويتية ليست بهذه السذاجة لتلغي كل ديونها على العراق مقابل اعتذار ادبي من الحكومة العراقية على الغزو الصدامي.
التعليق:
الظاهر وائل كفوري..عفواً وائل عبد اللطيف يمشي على نصيحة بيبيته الي كالتله كبل لا تموت ( حبوبه اذا تريد يصير براسك خير خالف حتى تنعرف بين الوادم )..والي يقابلها بالأمثال الشعبية المثل اليكول ( خالف تعرف )..لأن كلما صارت قضية عاف العراق وانحاز للطرف الثاني..بالاتفاقية الأمنية كام يدك على راسه ويصيح ما يصير أمريكا تقبل بالشروط العراقية لان صعب تنفيذها..قبل لا يفشل فشله تسوه عمره من طلعت الحكومة الأمريكية أقل حرصاً على مصالحها من ابن عبد اللطيف ووافقت على الشروط..وهسه يكول لازم الكويت ما تقبل تلغي ديونها..من تفهمنه أنت من يا مله؟!!.
يا بنت السطان حني على الدستور!!
الخبر:
توقع مصدر في لجنة التعديلات الدستورية أن يغلق ملف التعديلات الدستورية قبل إجراء الانتخابات القادمة, وأضاف: لم يبق من الفقرات المطلوب تعديلها إلى القليل، وهي الفقرات المتعلقة بصلاحيات رئاسة الوزراء، و رئاسة الجمهورية، والحكومة الاتحادية والمحافظات والأقاليم.
التعليق:
هو هنا مربط الفرس يا عيوني.. هاي الفقرات هي الي كابه بسببها الخلافات وصايره بالدفرات عليها..مو ذنيج التعديلات البسيطة الي سويتوها مثل تغيير حروف الجر واضافة همزة وحذف كسرة..وذكرتونه بذاك الفلاح الكال: ( أني ومرتي موافقين على زواج ابنه من بنت السلطان..وما باقي غير بس السلطان ومرته وبنته يوافقون )!!!.
المايسوكه مرضعه..الجامعة العربية ما تنفعه!!
الخبر:
بحث رئيس لجنة العلاقات الخارجية بالبرلمان الشيخ همام حمودي مع السفير هاني خلاف رئيس بعثة الجامعة العربية بالعراق دور الجامعة في تفعيل القرارت العربية المتعلقة بالغاء الديون والتمثيل الدبلوماسي العربي في بغداد.
التعليق:
شتبحث عمي الشيخ..اذا همه الجماعة خالين اذن من طين والثانية من عجين..صار أكثر من سنتين الجامعة العربية تصيح يابه عيب حسو مو كل دول العالم لغت ديونها عن العراق وبقيتو بس أنتو يلـ ( أشقاء )..بس هو المايسوكه مرضعة سوك الجامعة العربية ما ينفعه!!!.
كاظم الساهر ومجلس النواب!!
الخبر:
كشف مصدر برلماني ان النواب طالبوا خلال الجلسة المغلقة بتأمين حركة النائب من خلال سيارة مدرعة وزيادة عدد الحمايات وتوفير اسلحة نوعية مناسبة لهم وتوفير سكن محمي تتوفر فيه الحدود المعقولة للأمن. وقد وافق النواب بالاجماع على هذه الطروحات وطالبوا باقرارها قبل انتهاء الفصل التشريعي.
التعليق:
شوفو شلون ممثلين الشعب عدهم احساس عالي بالمسؤولية..من شافو أكو أزمة مالية وأسعار النفط انخفضت والميزانية قلت..طلبو هاي الطلبات ( البسيطة )..هاي بدال ما يطالبون بتخفيض رواتبهم وامتيازاتهم الي ناهبة ربع ميزانية البلد..وفدوه أروح للسانك كاظم الساهر من غنيت ( منين أجيب احساس للي ما يحس )!!!.
قانون النفط والغاز الفلكي!!
الخبر:
قال الفلكي التونسي الدكتور حسن الشارني، نائب رئيس الاتحاد العالمي للفلكيين ان الأزمة المالية الحالية التي تعصف بالعالم ستستمر حتى بدايات عام 2011، في المقابل أشار الفلكي التونسي إلى أن لبنان سيشهد توافقا سياسياً وتوحداً أما فلسطينيا،ً فتنبأ الشارني بزوال الانقسام الحاصل بين حركتي فتح وحماس، وعودة الوحدة السياسية بين الضفة الغربية وقطاع غزة أما عن سوريا فقال الفلكي التونسي.. سوف تكون هناك ضغوط هائلة ، ومخططات كيدية من دول وقوى كبرى، وسترافقها بعض الهزات.
التعليق:
عيني دكتور حسن مادام أنت هيجي تفتهم وتكدر تعرف شراح يصير ما يصير..ما تشوفلنه بطريقك عام 2009 راح يشهد اقرار قانون النفط والغاز..لو هم راح يبقى معلك مثل ما صار بلـ 2007 و2008!!!.
الاثنين 17 تشرين الثاني 2008
نأسف لازعاجكم..تعالو رحمة لوالديكم!
الخبر:
قال نائب رئيس مجلس النواب الشيخ خالد العطية إن هيئة رئاسة البرلمان أصدرت قراراً بإلغاء جميع الإجازات والايفادات الخاصة بأعضاء البرلمان حتى اكتمال المناقشات حول الاتفاقية الامنية.
التعليق:
أكيد القرار صدر بصيغة ( نأسف لازعاجكم .. تعالو رحمة لوالديكم )..لأن السادة النواب ما متعودين يحضرون للبرلمان..وكاضيها ايفادات واجازات وغيابات فضلاً عن التسخيتات..هسه تعالو كلكم حتى تتناقشون على الاتفاقية الأمنية..مو بعدين تكولون محد كال النه وما ندري ومهمشين!!!.
لحية الربيعي بيد السكرتيره!!
الخبر:
قال مصدر مطلع ان سكرتيرة وزير الأمن القومي موفق الربيعي، التي تدعى ( نجوان ) تستحوذ على نفوذ واسع في الوزارة يفوق صلاحيات الربيعي نفسه في بعض الأحيان.
التعليق:
شطلعت هاي ويه وزرائنا..شو كل واحد منهم طلع ( زلمة مريته ) وسكرتيرته مسيطرة علي..ذاك اليوم فاحة ريحة وزير الاتصالات وغلسنه..بس هسه مال موفق الربيعي مسلم لحيته ولحية الأمن القومي بيد السكرتيره هاي كلش ما ترهم وينرادلها حل!!!.
العتوي محمود عثمان!!
الخبر:
قال النائب عن التحالف الكردستاني محمود عثمان أن توقيع بغداد للاتفاقية الأمنية مع واشنطن سيؤدي إلى تقوية الحكومة العراقية مما سيعقد من المشاكل القائمة بين الجهاز التنفيذي المركزي وحكومة إقليم كردستان.
التعليق:
وشكو بيها عثمان وذا قوت الحكومة العراقية..وليش جنابك تريدها تصير ضعيفة..لازم ناوي مو خوش نية علمستقبل..وصدك لو كال أبو المثل ( مثل البزون ياكل ويدعي على أهلها بالعمى )!!!.
أهم شي الهاشمي!!
الخبر:
اِطلـَّع رئيس الجمهورية جلال الطالباني ونائباه عادل عبد المهدي وطارق الهاشمي على آخر المستجدات المتعلقة بالاتفاقية الأمنية المزمع توقيعها بين العراق والولايات المتحدة. وذكر بيان رئاسي أن نائب الرئيس طارق الهاشمي أشار إلى أن واشنطن أجرت تعديلات اضافية على الاتفاقية استجابة لطلب الحكومة العراقية.
التعليق:
أي والله خلوهم يطلعون وخاصة الهاشمي..حتى بعد لا يكولون جماعة التوافق احنه كلشي ما نعرف عن الاتفاقية..وصارت من وره ظهرنه..مثل ما يصرحون ويدكون على راسهم هسه!!!.
جيري آدامز بعثي!!
الخبر:
قال صالح المطلك ان العراق مهدد بالانزلاق في اتون حرب اهلية، معرباً عن اعتقاده بأن هناك حاجة للبحث عما وصفه بـ (جيري آدامز )عراقي- في اشارة الى زعيم الجيش الجمهوري الايرلندي السري الذي بذل جهودا جبّارة لاقناع زملائه بوقف النار والدخول في مفاوضات سياسية مع الحكومة البريطانية- واعتبر المطلك أنه يجد نفسه مؤهلا للعب هذا الدور.
التعليق:
المطلك كايم يشتغل مكلوبي..من استقر الوضع الأمني وأندفنت الطائفية حضرة جنابه يشوف أكو حرب أهلية..بعدين جيري آدامز ما جان بعثي ولا يشتغل يم سجودة ولا يدعم مجاهدي خلق!!!.
أنهجم بيت البانيه!!
الخبر:
قال النائب عن جبهة التوافق العراقية رشيد العزاوي ان اغلب وزراء جبهة التوافق لم يصوتوا على الاتفاقية الامنية بين العراق والولايات المتحدة.
التعليق:
هذا الجذب شلك بي يا عزاوي..همه الي صوتو على الاتفاقية جان عددهم 28 وزير..27 واحد صوتو لصالحها وبس الوزيرة نوال السامرائي ما صوتت الها..بعد هلـ ( أغلبية ) منين جبتهم..من أنهجم بيت البانيه شكد تنفخ!!!.
خارج نطاق التغطية:
عم استياء شعبي عام عبرت عنه مواقع انترنيت سعودية من قيام الملك السعودي بشرب الخمرة ( النبيذ ) في حفل افتتاح قمة مجموعة العشرين في واشنطن..وتناقل السعوديون صورة للملك نسخت من شريط فديو الحفل وهو يشرب الانخاب مع الرئيس بوش ورئيس كوريا الجنوبية. ويعتبر النبيذ من انواع الخمور المحرمة عند المسلمين ويتم جلد اي مواطن سعودي (او مقيم) يضبط وهو يتعاطى الخمرة.
التعليق:
هسه ما صار شي..طبقو القانون على الملك ( العركجي ) حاله حال العبريه وأجلدو اذا صدك أنتو دولة قانون!!!.
الاحد 16 تشرين الثاني 2008
سليم أبو مثولها!!
الخبر:
طالب الناطق الرسمي لجبهة التوافق سليم الجبوري بتشريع قانون عن الاتفاقية الامنية بين العراق والولايات المتحدة الامريكية.
التعليق:
قابل المتسولف مال التوافق ما يدري بالرد مال المحكمة الدستورية الي كالت ماكو داعي لاصدار قانون خاص بعقد الاتفاقية الأمنية ووضحت طريقة التصويت عليها..هسه لوما حضرة جنابه باللجنة القانوينة مال البرلمان جان كلنه غبي وما يفتهم..بس الظاهر هو يريد يثول روحه!!!.
لا تغلسون على الدستور!!
الخبر:
كشف عضو لجنة الأمن والدفاع النائب عن التحالف الكردستاني عادل برواري أن التحالف الكردستاني يطالب بنقل بعض من صلاحيات رئيس الوزراء الأمنية إلى رئاسة الجمهورية.
التعليق:
هاي شلون تريد ترهمها برواري..شو أنتو على كل شي تكولون هذا دستوري وهذا مو دستوري..لعد هسه شلون تريدون تغلسون على الدستور الي خال رئيس الوزراء هو القائد العام للقوات المسلحة ومنطي الصلاحيات الأمنية..لو تمشون بس على الي يصرفلكم بالدستور والي ما يصرف تدخلو من باب الحكومة التوافقية!!!.
دعاية انتخابية بالسجون!!
الخبر:
كشفت تقارير إن رئيس جبهة الحوار الوطني صالح المطلك قد لجأ إلى طريق جديد لمحاولة كسب المؤيدين في بغداد والمناطق المحيطة بها بعد أن اكتشف بأنه لا قاعدة حقيقة تسنده في الانتخابات، حيث بدأ يغدق الأموال الطائلة على عناصر مشبوهة ومطلوبة أمنياً أمثال:قائد صحوة أبو غريب أبو عزام التميمي وكذلك أبو العبد المسؤول السابق لصحوة العامرية.
التعليق:
لعد شلون تهمبل علينه وتكول راح اكتسح بالانتخابات..شو كمت تدور وين المطلوب الي يريد بس يريد يجلب بكشايه ويخلص نفسه حتى يلمولك أصوات..ولو هاي الشغلة مو جديدة عليك..لأن أنت ما تلم داير ما دايرك غير البعثيين والارهابيين والمطلوبين..وشبيه الشيء منجذب اليه..وننصحك ركز دعايتك الانتخابية بأقسان الأحكام الثقيلة بالسجون!!!.
شتريد مهاوي؟!
الخبر:
طالبت النائبة عن الكتلة الصدرية مها الدوري وزيري الداخلية والدفاع بتقديم استقالتيهما بعد عودة التفجيرات في بغداد.
التعليق:
ست مها لا تريد وزير داخلية ولا وزير دفاع..وما تقبل ببقاء القوات الأمريكية..وبنفس الوكت ما تريد جدولة انسحاب..وترفض الاتفاقية الأمنية..و و و الخ من الطلبات المتناقضة..بس لو نفتهم شتريد مهاوي لعد!!!.
القوانين بالنيات!!
الخبر:
أوضح عضو لجنة النفط والغاز البرلمانية نور الدين الحيالي أن وزارة النفط خرجت عن إطار قانون النفط والغاز حيث أبرمت الوزارة عقداً مع شركة شيل الهولندية لاستثمار الغاز في الجنوب دون عرضه للمنافسة بين الشركات الأجنبية وكذلك بدون عرضه على مجلس النواب ودون تشريع قانون لهذا العقد.
التعليق:
هو وينه قانون النفط والغاز..غير تشرعوه أول مرة يله بعدين تمشي علي وزارة النفط..مو هو نايم نومة أهل الكهف صارله سنتين تقريباً وبعده ما مصادق عليه رسمي وتريد الوزارة تشتغل بي..لو عدكم القوانين بالنيات!!!.
عصفور وأنكطع خيطه!!
الخبر:
بيّنت المفوضية العليا المستقلة للانتخابات انها وضعت قانونا يلزم الكيانات السياسية التي تقوم بلصق ملصقاتها الانتخابية على جدران الشوارع بنزعها خلال مدة معينة بعد الانتخابات.
التعليق:
هو القانون من حيث المبدأ كلش عال يا عبد العال..بس بي ثغرة وحدة هي أنه الكيانات الي ما راح تفوز بالانتخابات وين راح تلزموها وبيمن تحكموها..جان لازم تخلون تأمينات خاصة بعملية التنظيف ما ترجع الا بعد رفع مخلفات الحملة الانتخابية..لأن اذا مو هيجي راح تبقى دعايات الخسرانين ماليه الشوارع وما تشوفون وجهم ويصيرون عصفور وأنكطع خيطه!!!.
عوفوها على فتكها الأولي!!
الخبر:
أشار الشيخ همام حمودي الى ان وزارة التجارة وزارة مهمة ويجب ان ترتقي بمستواها الحقيقي الذي يتأمله منها المواطن مضيفاًً ان البطاقة التموينية شريان الحياة للمواطن ويجب الاهتمام بها وتحسينها.
التعليق:
شيخنا جزنه من العنب..هسه ما نريد منهم لا يهتمون بيها ولا يحسونها..خلي يرجعوها على فتك الأول هواي أحسن..لأن هسه كل شهر الأجهزة الرقابية جاي تكتشف مادة موزعة بالحصة غير صالحة للاستهلاك البشري..وأخرها فضيحة الحليب الملوث!!
السبت 15 تشرين الثاني 2008
فحل التوث بالبرلمان هيبه!!
الخبر:
قال الناطق باسم جبهة التوافق سليم إن موضوع الاتفاقية الأمنية مسألة وطنية لا تخص كتل سياسية معينة، وطالما أن المسألة مرتبطة بأجيال قادمة فمن المفترض أن يتحملها الشعب العراقي بقوله بنعم أو لا من خلال استفتاء جماهيري.
التعليق:
بس نريد من الجبوري يفهمنه شغله..اذا بكل زغيره وجبيره نركض للاستفتاء حتى يحلنه المشكلة..لعد بعد شنو فايدة البرلمان..غير النواب همه ممثلين عن الشعب ويحجون بأسمه وكل واحد يعبر عن ارادة الناس الي انتخبو..لو حاطيهم احديدة عن الطنطل!!!.
سجينة خاصرة!!
الخبر:
أكد النائب في مجلس الأمة الكويتي فيصل المسلم أن إسقاط الديون الكويتية المترتبة على العراق مرفوض من حيث المبدأ طالما كان مجلس الأمة موجودا، وعلى الحكومة ألا تحاول إسقاط حقبة الغزو العراقي على الكويت من التاريخ، رافضاً تغيير مصطلح الغزو العراقي بالعدوان الصدامي.
التعليق:
هذا الخطاب مال واحد يريد يبقى مجلب بالماضي ويغمض عيونه عن كل التغييرات الي صارت بالعراق..وهذا النائب لا كلبه محترك على الكويت ولا على الكويتيين..بس يريد يوكف سجينة خاصرة للعراق الجديد تنفيذاً لأجندة الجهات الارهابية التكفيرية المنتمي الها..ومع الأسف الحكومة الكويتية تسلم لحيتها بيد جم واحد من هاي النماذج التعبانة!!!.
سفير تحفه!!
الخبر:
حث القائم بالأعمال العراقي في مانيلا عادل مولود الفلبين على رفع حظر السفر المفروض منذ أربعة أعوام الى بلاده من أجل السماح للمزيد من الفلبينيين بالعمل هناك في ظل جهود اعادة الاعمار الضخمة. وقال مولود ان هنا حاجة الى مزيد من العمالة الأجنبية حيث سينفذ العراق مرحلة جديدة من أعمال اعادة اعماره العام القادم.
التعليق:
لو أحنه بشهر الرابع جان كلنه هذا الخبر كذبة نيسان..لأن مستحيل واحد يصدك هيجي خبر يرفضه العقل والمنطق..احنه غالبية شبابنا كاعدين عطالة بطالة..أو بأحسن الأحوال يشتغلون بوظائف بطالة مقنعة..والسيد القائم بالأعمال يجدي عمال من الفلبين..وصدك لو كال أبو المثل ( مخبل اليسولف .. عاقل اليسمع )!!!.
مختار لماني ورياض أحمد!!
الخبر:
قال مبعوث جامعة الدول العربية السابق لدى العراق مختار لمانى ان الوضع الأمني في العراق سيء جداً ولا يوجد أي تقدم في هذا المجال، مؤكداً ان عدد حراسه في العراق كان حوالى 12 فرداً معهم 6 أسلحة، منها أربعة لاتعمل، و2 بدون ذخيرة.
التعليق:
شو ما افتهمنه لماني..مرة يكول الوضع الأمني مو زين..ومرة يكول حمايتي جانو بس ست نفرات وأسلحتهم ما تشتغل..لعد بعد أكو أحسن من هيجي امان اذا تمشي بحماية نص ردن..لو على كولة رياض أحمد ( حجيك صاير مرة ومرة )!!!.
أصلح ربعك يا أبو الإصلاح!!
الخبر:
اعتقلت قوات الأمن في بابل مدير هيئة النقل الخاص محمد رمضان، مرشح تيار الاصلاح في المحافظة، بسبب قضايا فساد اداري ومالي.
التعليق:
لعد شراح يصلحلنه الجعفري اذا مرشح تيار الاصلاح مالته لانتخابات مجالس المحافظات ببابل طلع حرامي..ومرشحة التيار بصلاح الدين بعثية..اصلح ربعك أول مرة يا أبو الاصلاح!!!.
وين قوانينكم؟!
الخبر:
اتهم عدد من أعضاء مجلس النواب منظمات المجتمع المدني بانتهاك حقوق الإنسان، وارتكاب جرائم ضد النخب الثقافية والإعلامية، فضلا عن عمليات الاغتيال والاختطاف.
التعليق:
طبعاً كل هاي الخروقات تطلع من منظمات المجتمع المدني اذا البرلمان لحد الان ما مشرع قوانين خاصة بيها تنظم عملها..وحتى حقوق الانسان الي تدافعون عنها هم ما منظمين القوانين الخاصة بي..وباقين بس جاي وجذب!!!.
السوداني..لعب لعب الخضيري بشط!!
الخبر:
اتهم رئيس لجنة النزاهة النيابية صباح الساعدي وزير التجارة عبد الفلاح السوداني بالموافقة على استيراد خمسة آلاف طن من الحليب الصيني الملوث بمادة الميلامين الكيميائية، والذي سبق لأغلب دول العالم ومنها سوريا أن منعت استيراده لثبوت تسببه بحالات تسمم أودت بحياة عدد من الأطفال الصينيين.
التعليق:
هسه لو مو يستورد حليب ملوث..هسه لو وزير التجارة يوزع الجمرة الخبيثة بالحصة التموينية هم محد راح يكدر يكله على عينك حاجب..لأن أكو واحد أو اثنين من المسؤولين ( الي بالي بالك ) ساندين ظهره وعايفي يلعب لعب الخضيري بشط وهو مطمأن على كرسي الوزارة باقي ومجير طابو اله!!!.
الجمعة 14 تشرين الثاني 2008
كشكول الجمعة
حدث الأسبوع/
في الوقت الذي كانت فيه كتلة التحالف الكردستاني تبارك تشكيل مجالس الاسناد في المحافظات، أنتفضت فجأة و ( بدلت ) 360 درجة وبدأت تطلق تصريحات ( مال ناس مو رزنه ) ما أن تم تشكيل مجالس اسناد في محافظتي كركوك والموصل. حيث أصدر الحزبان الكرديان ( الاتحاد الوطني والحزب الديمقراطي ) بياناً شبيها فيه هذه المجالس بقوات الجحوش التي أسسها صدام ( وما نعرف شجاب الدولمه على الجلاق )، ونظم نواب كتلة التحالف حملة اعلامية لمهاجمة القرار، تراجعت بسببها شعبية المسلسلات التركية المدبلجة، بسبب سيطرة النواب الأكراد على شاشات الفضائيات ( من الصبح للـ ليل )، ومن الغريب حقاً أن توجه الأحزاب الكردية كل هذه الانتقادات لمجالس الاسناد التي شكلتها الحكومة، في حين تغض النظر عن وجود ميليشياتها المسماة بـ ( البيشمركه ) في هذه المناطق بدون غطاء قانوني!.
فلم الجمعة/
سيكون معنا وجه جديد في فلم هذا الأسبوع، وهو حضرة السيد وزير الشباب والرياضة جاسم محمد جعفر بطل فلم الاسبوع الذي يحمل عنوان ( جيب الدرع جيبه ). حيث ان هذا الوزير الفطحل ترك عشرات الالاف من الرياضيين العراقيين ( السابقين والحاليين ) بدون دعم، كما لم يلتفت الى البطل العراقي الذي فاز ببطولة العالم لبناء الأجسام مؤخراً، ولم يذكره بـ ( رحم الله والديك )، لكن وزير الرياضة ( العراقــــــــــــــي ) ونكرر ( العراقــــــــــــــــــي ) وليس الأمريكي، هرول ليمنح الرئيس الأمريكي بوش درع الوزارة في احتفالية صرفت فيها الاف الدولارات خصصت لتسليم درع الوزير اللوكي للسفير الأمريكي في العراق ( الكابتن ) كروكر!.
عجيب أمور غريب قضية/
رغم تخويل المحكمة الدستورية الذي منحته الى البرلمان للتصويت على مشروع الاتفاقية الأمنية بنصاب الأغلبية البسيطة، أى بنصف الحضور زائد واحد، الا ان أعضاء البرلمان لا زالوا يتقاذفون كرة الاتفاقية كل على جهة!.
بالباكيت/
بعد فضيحة ترشيح عضوة في حزب البعث المنحل لانتخابات مجالس المحافظات في صلاح الدين عن قائمة تيار الاصلاح التي يتزعمها ابراهيم الجعفري، سجل هذا الأسبوع فضيحة جديدة لابراهيم الجعفري زعيم التيار بعد القاء القبض على مرشح التيار في بابل المدعو ( محمد رمضان ) مدير هيئة النقل الخاص في المحافظة، بتهمة الفساد الاداري والمالي.. ( وخوش اصلاح )!.
يقال/
يقال والعهدة على مصدر في الهيئة العامة للكمارك ان المهرب الذي القي القبض عليه في منفذ طريبيل الحدودي عندما كان يحاول تهريب مبلغ (228) الف دولار و(100000) يورو و( 300000000) مليون دينار عراقي، اعترف صراحة بان هذه الاموال تعود الى وزير المالية باقر الزبيدي، وان الأخير بذل محاولات محمومة من اجل اطلاق سراح المهرب والاموال!.
صدق و لا تصدق/
صدق ان التفجير الارهابي الأخير الذي حدث في مستشفى الفارس في الفلوجة، نفذته امراة مختلة عقلياً تم تفخيخها وتفجيرها عن بعد .. ولا تصدق ان التنظيمات الارهابية ستسنطيع ان تقنع مستقبلاً أي ( مسودن او مخبل ) بتفجير نفسه ( لأن حتى المخابيل هم ما يقتنعون بهذا الجهاد )!.
تدرون لو ما تدرون؟/
عيوني تدرون أنه وبفضل انجازات وزير التجارة المصخم عبد الفلاح السوداني، صرح برنامج الاغذية العالمي التابع للامم المتحدة انه نحو مليون عراقي يعانون من نقص بالطعام المناسب!.
واي واي/
برنامج تبادل المعتقلين والمحكومين بين العراق والسعودية تنفذ من الجانب العراقي، ولكن السلطات السعودية التفت على الاتفاق وسلمت للجانب العراقي لاجئين عراقيين كانوا في معسكر رفحاء، بحجة أنهم معتقلين ومحكومين!.
سري وشخصي/
علمنا من مصادر خاصة ان الحزب الاسلامي لن لن يشارك بانتخابات مجالس المحافظات في الانبار بقائمة تحمل اسمه أو تشير اليه صراحةً، بل دخل بتحالفات مع بعض شيوخ العشائر، خوفاً من الفشل الذريع الذي يتوقعوه، كون ان مواطني المحافظة ناقمين على الحزب بسبب أعضائه الذين يشغلون أغلب المناصب القيادية في المحافظة حالياً.
اعلان/
تنفيذاً لتوجيهات وزير الكهرباء كريم وحيد بترشيد استهلاك الطاقة الكهربائية، اصدرت وزارة الكهرباء قائمة الأجهزة الممنوع تشغيلها من قبل المواطن، واستعمال كافة الأجهزة الأخرى الغير واردة أدناه. والأجهزة الممنوع استخدامها هي:
(( الثلاجات، المجمدات، التلفزيونات (وطبعا اذا ما تشغلون التلفزيون يعني ما راح تشغلون لا ستلايت ولا سي دي ولا دي في دي)، المسجلات، الراديوات (الكهربائية فقط ويسمح باستخدام راديو السيارة او الراديو ابو الباتري) سخانات الماء (بين قوسين الكيزرات)، المكواة (يعني الأوتيات)، مجفف الشعر (أو ما يدعى بالسشوار وفي رواية أخرى الفير)، مكائن الحلاقة، مكائن الخياطة، المدافئ الكهربائية، الهيترات، ماطورات الماء، الشمعات، المصابيح، ألأجهزة المكتبية من قبيل الحاسوب والاستنساخ والطابعة )) ويستحب أيضاً عدم استخدام شاحنة الموبايل الا في حالات الضرورة القصوى وظهور عبارة (الشحن ضعيف)!.
خارج نطاق التغطية/
* اعلن رئيس الوزراء الروسي فلاديمير بوتين تأييده اقتراح تمديد الولاية الرئاسية في روسيا من اربعة الى ستة اعوام.
* أقرّ البرلمان الجزائري تعديلات دستورية قدَّمها الرئيس بوتفليقه ليتمكن من الترشيح لولاية رئاسية ثالثة وتتضمن بصورة خاصة إلغاء الحدّ الأقصى لعدد الولايات الرئاسية المتتالية لرئيس واحد.
سين سؤال؟/
عضو برلمان دائم المجاهرة بانتمائه السابق لحزب البعث المنحل، وكانت اخر بطولاته الرفاقية هو اعلانه رفض بند في الاتفاقية الأمنية يشير الى (فلول النظام السابق) وقال أنا من هذه الفلول..فمن هو؟
لارسال اجاباتكم يرجى الاتصال بالنائب ( الرفيق ) خلف العليان..ولا يسمح بابلاغه عن الجواب الصحيح الا بعد ترديد الشعار!.
المحطة الأخيرة/
أعادت شرطة ديالى 600 عنصر تم فصلهم سابقاً، أغلبهم من عناصر تنظيم القاعدة الارهابي
( حاميها إرهابييها )!.
الخميس 13 تشرين الثاني 2008
وصايا الرفيق القائد ابراهيم الجعفري!!
الخبر:
أصدر رئيس تيار الإصلاح الوطني الدكتور إبراهيم الجعفري مجموعة من الوصايا الخاصة لمرشحي التيار في انتخابات مجالس المحافظات.
التعليق:
وصايا الجعفري تذكرنه بوصايا مشعول اللشه القائد الضرورة..لأن ذاك هم سواله مسله مال وصايا خرط مثل مال الدكتور هسه..وأكيد كثر بالوصايا عباراته الشهيرة مثل الشفافية والموزائيك..لأن هو استاد بذني..بس ما ندري الرفيقة البعثية المرشحه عن قائمة التيار بمحافظة صلاح الدين راح تلتزم بهاي الوصايا لو بوصايا الرفيق القائد!!!.
الراتب من الوزارة والولاء للبيشمركة!!
الخبر:
رفض الغالبية العظمى من أفراد لواء تابع للفرقة الثانية كان يقوم بمهمات أمنية في الموصل، تنفيذ أوامر وزير الدفاع بالانتقال الى منطقة الحبانية. وقال مصدر مطلع في وزارة الدفاع ان رفض هؤلاء الافراد يعود الى كونهم من افراد البيشمركة، وقد تلقوا أوامر من قيادات البيشمركة بعد الالتزام بأمر التحرك.
التعليق:
تره هاي ما ترهم مال جندي ياخذ الأوامر من جهتين..لازم تكون لكل افراد الجيش العراقي مرجعية وحده يمتثلون لأوامرها..مو ياخذون رواتبهم من الدفاع ويشتغلون للبيشمركه..هسه ينراد اجراء حازم من وزارة الدفاع بحق ذوله المتخاذلين..لأن بين ولائهم اليا جهة..ووزير الدفاع دائماً يكول ولاء أفراد الوزارة لازم يكون لكل العراقيين..لو هذا بس تصفيط حجي؟!!.
رئيس الاقاليم ما يريد أقاليم!!
الخبر:
أعرب رئيس لجنة الأقاليم في مجلس النواب، النائب عن جبهة التوافق هاشم الطائي عن تخوفه من تشكيل أقاليم جديدة بالعراق في الوقت الراهن لما تسببه من مشاكل حدودية وإدارية.
التعليق:
لعد أنت شنو شغلك يا سيادة رئيس لجنة الأقاليم اذا تعارض تشكيل أقليم جديد..هذا حق دستوري ويبقى قراره بيد أهل المحافظة..اذا ما صوتوله ما يتشكل الاقليم..واذا اختارو انت ولجنتك تحل كل شي يتعلق بي..مو تتحجج بالمشاكل وتبقى خايف وتطكطك!!!.
جحا والاتفاقية الأمنية!!
الخبر:
نقلت محطة أمريكية عن نائب من المجلس الأعلى، فضل عدم الكشف عن أسمه، قوله: نحن عموماً داعمون للاتفاقية، لكننا في موقف حرج جدا، فإذا قلنا نعم، سيقول الناس عنا اننا خونة، وإذا قلنا لا سيقولون اننا أذناب الإيرانيين.
التعليق:
خلو مصلحة العراق هي الدافع الرئيسي بموقفكم من الاتفاقية..مو الخوف من حجي الناس..تره رضا الناس مطلب لا ينال..واذا تبقون هيجي راح تصير سالفتكم سالفة جحا وأبنه والمطي!!!.
تقصير جماعي!!
الخبر:
أرجع مدير قيادة العمليات وزارة الداخلية اللواء عبد الكريم خلف أسباب التدهور الامني الاخير في بغداد إلى تقصير جهاز المخابرات والاستخبارات العسكرية في وزارة الداخلية، فضلا عن تقصير وزارة الأمن الوطني في أداء مهامها.
التعليق:
لا تظلون واحد يذبها براس الثاني وبس تريدون تدفعون عنكم المسؤولية..كل القوات عبارة عن جهاز أمني واحد مهمته الاولى حماية العراق..يعني كلكم تتحملون المسؤولية..سوو حل لهاي الخروقات الأمنية بدال ما ملتهين واحد يذب الصوج باللاخ!!!.
هدية عمو ارهابي للتلاميذ!!
الخبر:
أفاد مصدر مسؤول في شرطة كركوك أن ارهابيين قاموا بحرق مدرسة في قضاء داقوق. وأضاف المصدر إن الحريق أسفر عن تدمير ثلاثة صفوف.
التعليق:
هاي هدية من الارهابيين للتلاميذ بمناسبة بدء العام الدراسي الجديد..حركو مدرستهم حتى تصير سوده ومصخمة مثل حالة الارهابيين هسه..الي طاحو من كثرة كفخات قواتنه الأمنية على روسهم!!!.
انجازات وزير الكهرباء!!
الخبر:
قالت وزارة الكهرباء انها تمكنت من انجاز كامل خطتها الاستثمارية للعام الحالي 2008 من المشاريع المخطط إقامتها من خلال ميزانيتها البالغة بحدود 1.7مليار دولار.
التعليق:
اجت نهاية السنة وبده الجذب والهمبلة من الوزراء..وواحدهم يصير بربه شاطر ويكوم يصلخ على الشعب اني سويت هيجي وصرفت هلكد وأني وأني حتى يغطون شويه من فشلهم الذريع..بس يجوز هاي الكلاوات يكدر يعبرها أي وزير عدا وزير الكهرباء..لان المواطن تمتع بـ ( انجازاتـــــــــــــــــــــه ) ويعرفها كلش زيـــــــــــــــــــــــــــن..والعاقل يفتهم!
الاربعاء 12 تشرين الثاني 2008
يله يا فطاحل البرلمان!!
الخبر:
ذكرت مصدر في المحكمة الدستورية أن المحكمة خولت البرلمان بالتصويت على مشروع الاتفاقية الأمنية بنصاب الأغلبية البسيطة، أى بنصف الحضور زائد واحد. ولم تجد المحكمة ضرورة لسن قانون خاص للتصويت على الاتفاقية.
التعليق:
هاي هم المحكمة الدستورية وضحت الأمور للسادة النواب وخولتهم بالتصويت على الاتفاقية بعد ما جانو يتحججون بالدستور والقانون وواحد يذبها براس الثاني وأخير شي يريدون يسوون استفتاء عليها ولا حسبالك همه ممثلين عن الشعب..بعد شينتظرون فطاحل البرلمان حتى يفضون قضية الاتفاقية؟!!.
دكتاتورية طيفور باشا!!
الخبر:
أصدر مكتب النائب الثاني لرئيس مجلس النواب، عارف طيفور، كتاباً رسمياً منع بموجبه مراسل قناة الحرة من الدخول الى مبنى البرلمان، بسبب نقله لمشادة كلامية وقعت بين طيفور والنائب الايزيدي أمين فرحان.
التعليق:
هاي اذا السيد النايب يتعامل بهيجي دكتاتورية..لعد شلون راح نترجى نشوف ديمقراطية من البرلمان والنواب..اذا حضرتك هيجي مستحي يا طيفور باشا جان ما تعاركت وتصايحت بالبرلمان..مو تسوي دكتك وتريد الناس تغلس عليها!!!.
ودع صولاغ شحمه!!
الخبر:
قال مصدر في الهيئة العامة للكمارك ان المهرب الذي القي القبض عليه في منفذ طريبيل الحدودي عندما كان يحاول تهريب مبلغ (228) الف دولار و(100000) يورو و( 300000000) مليون دينار عراقي، اعترف صراحة بان هذه الاموال تعود الى وزير المالية باقر الزبيدي. واكد المصدر ان الزبيدي بذل محاولات محمومة من اجل اطلاق سراح المهرب والاموال الا ان محاولاته باءات بالفشل.
التعليق:
لعد صولاغ الي خمسة وعشرين ساعة باليوم يسولف عن خططه الاقتصادية الجبارة..ولاحك الموظفين بعربانه على الزيادة..تبين هو طالع بالدخل كبل..وصدك لو كال الحكيم اليوناني ( ودع البزون شحمه )!!!.
جبهة الحرامي الوطني!!
الخبر:
أعلن النائب علي الصجري انسحابه من جبهة الحوار الوطني التي ينتمي إليها قائلاً: أن هناك تراكمات كثيرة لانسحابنا من كتلة الحوار الوطني آخرها اختيار عناصر غير كفوءة أو نزيهة في انتخابات مجالس المحافظات المقبلة، وبعد أن وعدنا الناس بالتغيير، جئنا لنبدل السيئ بالأسوأ.
التعليق:
لا هوايه لعد المطلك عنده قاعده شعبية وواثق من الاكتساح بانتخابات مجالس المحافظات..اذا هو أقرب الناس اله ورفيقه بالجبهة شرد منه ومن المرشحين مالته..لعد الناس شلون راح تنتخبهم..وما دام المرشحين طلعة مو نزيهين مثل ما يكول الصجري..ننصح المطلك أن يسمي قائمته ( جبهة الحرامي الوطني )!!!.
البلاد النفطية والوزراء العفطية!!
الخبر:
قال مصدر مطلع في وزارة النفط، فضل عدم الكشف عن أسمه، ان الوزارة بصدد اصدار قرار ترفع بموجبه اسعار الوقود بدءاً من مطلع العام المقبل.
التعليق:
لازم الشهرستاني يشتغل بالمكلوبي..من تنزل اسعار النفط بالعالم هو يصعد السعر على الشعب العراقي الي يعتبر بلده من البلاد النفطية المبتلية بهاي الوزراء العفطية..أتقو الله..صندوق النقد وراح تنتهي الاتفاقية ويا..بعد حجتكم شنو على هذا القرار؟!!.
لكم الأجر والثواب!!
الخبر:
قال مصدر مسؤول في مجلس محافظة ديالى إن أكثر من 400 شرطي ممن تمت إعادتهم للخدمة لم يتسلموا مرتباتهم بسبب عدم وجود مخصصات من وزارة المالية.
التعليق:
لعد شكو رجعتوهم للخدمة اذا ما مخصصيلهم رواتب..قابل يشتغلون علمود الأجر والثواب..وبعدين اذا الجهات العليا موافقة على قرار رجوعهم ليش وزارة المالية ما تنفذ..لو المالية صايرة دولة بداخل دولة ومحد يكدر يحاجيهم لأن بيدهم الصايه والصرمايه!!!.
بطل العالم بالتبريرات!!
الخبر:
كشف مدير الموارد المائية في ذي قار عن حصول انخفاض في مناسيب نهر الفرات المار عبر المحافظة قرابة النصف متر.
التعليق:
يمعودين لا يسمعكم وزير الكهرباء ومن باجر يطفي الكهرباء الوطنية اسبوع جره وحده بحجة مي النهر نازل مثل ما صرح قبل فترة وكال سبب أزمة الكهرباء انخفاض المناسيب بدجلة والفرات..تره أبن وحيد يدور حرشه وماكو تبرير بالعالم يفوته!!!.
الثلاثاء 11 تشرين الثاني 2008
انتخابات تنكريه!!
الخبر:
قال مصدر مطلع ان الحزب الاسلامي لن يشارك بانتخابات مجالس المحافظات في الانبار بقائمة تحمل اسمه أو تشير اليه صراحةً، بل دخل بتحالفات مع بعض شيوخ العشائر، للتحايل على مواطني المحافظة الناقمين على الحزب بسبب أعضائه الذين يشغلون أغلب المناصب القيادية في المحافظة حالياً.
التعليق:
شنو هللذه من هلفكر..اذا الحزب الاسلامي يدري بنفسه هيجي ملبوس بالأنبار والناس ما تريده شكو يسوي هلحيلة ويدخل متنكر حسبالك مشارك بانتخابات تنكرية على غرار الحفلات التنكرية..واذا اذا من البداية حيلة ومكر..لعد لا هواي راح يفيدون أهل الأنبار اذا فازو بالانتخابات..تره اليعيش بالحيلة يموت بالفكر!!!.
بشار الطائي!!
الخبر:
قال الرئيس السوري بشار الأسد إن الوجود الأمريكي في العراق يهدد أمن الدول المجاورة للعراق ويهدد استقرار المنطقة.
التعليق:
مشاكلك أنت وأمريكا حلوها بيناتكم ولا تدخل العراق بالنص..واذا الوجود الأمريكي يهدد عرش مملكتك ودول الجوار مثل ما تكول..فنحب نذكرك أنه أنت وبقية الجيران ما قصرتو بتهديد أمن العراق بكرمكم الحاتمي ودعمكم للارهاب!!!.
صحفيون نفطيون نص ستاو!!
الخبر:
قال رئيس تحرير صحيفة ( صوت الأمة ) المصرية عبد الحليم قنديل ان الاندفاع العربي المفاجئ لإرسال سفراء إلى العراق يأتي نتيجة املاءات أمريكية.
التعليق:
الظاهر هذا ظلمة ما أدري قنديل بعده متمسك بهذا الخطاب الغير صالح للاستهلاك البشري الي مجلب بي هو وزملائه الكتاب النص ستاو..وما يعجبه هذا الانفتاح العربي على العراق وهذا التحول الايجابي بالملف الدبلوماسي..ويريد يرجع عقارب الزمن ليوره..لأيام كوبونات النفط مال القائد الضرورة!!!.
الكابتن عمو بوش!!
الخبر:
منح وزير الشباب والرياضة جاسم محمد جعفر الرئيس الأميركي جورج بوش درع الوزارة تقديراً لدعمه المتواصل للرياضة العراقية في احتفالية أقيمت في فندق الرشيد. وقال الوزير أثناء تسليمه الدرع للسفير الأميركي في العراق رايان كروكر، إن مواقف الرئيس بوش الداعمة لرياضة العراق جعلته بطلا قومياً.
التعليق:
نهائي كأس أسيا بفضل وزير الكهرباء ( الله يشلعه من كرسيه ) ما شفته لأن جانت الكهرباء طافية..بس سمعت يونس محمود سجل هدف الفوز مو جورج بوش..ولا سامع فد يوم عمو بوش درب المنتخب بدال عمو بابا..بعد شنو هلتصرف الفطير من حضرة الوزير حتى ينطي درع ويكول بطل قومي..بدال ما توزع دروع للرؤساء أهتم شويه برياضيين البلد!!!.
المخابيل أعقل من القاعدة!!
الخبر:
أفاد مصدر في الشرطة العراقية بناحية عامرية الفلوجة أن الأجهزة الأمنية حصلت على معلومات تفيد بأن الانتحارية التي فجرت نفسها داخل مستشفى الفارس كانت مختلة عقلياً وتم تفجيرها بواسطة جهاز تحكم عن بعد.
التعليق:
مندري هاي عمليات ارهابية لو القاعدة عدها حملة ضد المخابيل..لأن هاي الفترة أتوجهو على المسودنين وكامو يجاهدون بيهم..بس الغريبة أنه هم جاي يواجهون صعوبة يله يشوفون مخبل يقتنع أنه يفجر نفسه!!!.
فساد اداري مفضوح!!
الخبر:
حمل الوفد البرلماني الذي زار محافظتي كربلاء وبابل وزارة البلديات والأشغال العامة مسؤولية انتشار مرض الكوليرا بسبب تركها المشاريع الخدمية ناقصة التنفيذ.
التعليق:
لعد شلون يستلمون هاي المشاريع من المقاولين وهي كاملة..أكو أكيد اتفاقات وفساد اداري بالموضوع..ولازم الموضوع ما ينتهي لحد تحميل الوزارة المسؤولية..لازم المقصرين يتحاسبون..مو تطمطم القضية لأن المتورطين من الحزب الفلاني لومن المنظمة العلانيه!!!.
شدو روسكم يكرعان!!
الخبر:
دعت وزارة الكهرباء المواطنين كافة الى استخدام المدافئ والسخانات النفطية والتقليل من استخدام المكواة وكل الاجهزة ذات الاستهلاك الكبير من الطاقة الكهربائية للمحافظة على مستوى التجهيز الحالي من الطاقة الكهربائية.
التعليق:
ليش قابل المواطن راح يخلص اذا ما كوه ملابسه وسبح بمي بارد..مو أنوب النفطات راح يخلصن باول اسبوعين من الشته..شو هي وحده أنكس من الثانية..وهمزين وزير الكهرباء الكلش محترم ما موفر الطاقة الكهربائية 24 ساعة باليوم..جان شدو روسكم يا كرعان!!!.
الاثنين 10 تشرين الثاني 2008
ذبها براس الفاتيكان وأطلع منها سالم!!
الخبر:
قال رئيس ديوان الرئاسة نصير العاني إن مجلس الرئاسة كان يتمنى أن يمر المشروع الذي تقدم به ممثل الأمين العام للأمم المتحدة ستيفان ديمستورا، إلا أنه بعد دراسة مستفيضة مع سفير الفاتيكان، فإن مجلس الرئاسة قرر التصديق على القرار الذي تم التصويت عليه في مجلس النواب.
التعليق:
هاي شلون رهمتوها يا هيئة الرئاسة..شو من جهة كلكم تطالبون بعدم التدخل الخارجي بالشؤون العراقية..وهسه تصادقون على فقرة الأقليات بناءاً على موافقة سفير الفاتيكان علموضوع..ليش منو نصب هذا السفير وصي على الاقليات الموجودة بالعراق حتى تمشون برايه..لو ذبيتوها براسه حتى تطلعون نفسكم مثل الشعرة من العجين وما تلتزمون بزماطكم الي زمطتو بي كدام الاقليات!!!.
تالي وياك يلبرزنجي!!
الخبر:
انتقد النائب عن التحالف الكردستاني سعدي البرزنجي إنشاء مجالس إسناد في محافظة كركوك معتبراً أن هذه المجالس تشبه الأفواج الخفيفة والجحوش التي كان يستعملها النظام السابق لمحاربة الأكراد، وأوضح البرزنجي أن كركوك ليست بحاجة إلى مجالس إسناد لأن الوضع مستتب فيها.
التعليق:
الظاهر البرزنجي وجم واحد من رفاقه بالتحالف الكردستاني الي ما يريدون أي شي يصير بكركوك ومناطق الخط الأزرق اذا مو للأكراد أو البشمركه ضلع بي..من دخلت القوات الأمنية لخانقين كالو شكو جايين مو البشمركة يحمون المنطقة..ومن وزارة الدفاع صدرت اوامر نقل لبعض الضباط الأكراد من كركوك لغير مناطق كالو ذوله يستلمون اوامرهم من وزارة البيشمركة..وهسه البرزنجي سواله داور كيسه على مجالس الاسناد وشبها بجحوش صدام وكال ما الها داعي لان الامن مستتب بكركوك..وصدك لو كال المطرب ( شلون تالي وياك شلون )!!!.
جبهة الروافق!!
الخبر:
قال النائب عن جبهة التوافق رشيد العزاوي إن الجبهة والحزب الاسلامي هما الجهة الوحيدة التي دافعت عن البعثيين المظلومين الذين شملوا بقانون اجتثاث البعث.
التعليق:
اذا البعثيين همه المظلومين..لعد ضحاياهم شنو بنظر التوافق والحزب الاسلامي..أكيد يعتبروهم جلادين حسب مبادئ أعضاء الجبهة من الرفاق المناضلين..وبعدين تره اثارتكم لهذا الموضوع بهذا الوكت وفيكتكم هاي مكشوفة..ومو حباً بزيد أو بعبيد..هاي كلها الهدف منها دعاية انتخابية حتى تكسبون أصوات الرفاق..وتصير جبهتكم ( جبهة الروافق )!!!.
ليش التردد؟!
الخبر:
اعلن الناطق المدني لخطة فرض القانون تحسين الشيخلي انه سيتم قريباً إعادة افتتاح جسر الأئمة الذي يربط بين الاعظمية والكاظمية.
التعليق:
شوكت بعد..مو صار سنة نسمع وعود قيادة خطة فرض القانون..ويوميه اليوم وباجر..ومندري ليش هذا الخوف والتردد والتأخير بهاي الخطوة المعنوية رغم أنه العراقيين بصورة عامة واهل المنطقتين بصورة خاصة دفنو الفتنة الطائفية جوه سابع ارض.
العلم الجديد والزلاطة!!
الخبر:
قال رئيس لجنة تصميم العلم العراقي الجديد النائب مفيد الجزائري ان اللجنة ستختار في المرحلة الاولى 164 نموذجا تضاف لها ثلاثة نماذج، وهي العلم بشكله الحالي وعلم 14 تموز 1958 وعلم العهد الملكي، ليصبح عدد الاعلام الفائزة بالمرحلة الاولى 167 نموذجاً. ومن ثم يتم اختيار ثلاثة نماذج رئيسة وثلاثة نماذج احتياط ترسل الى مجلس النواب للتصويت عليها. والنموذج الذي يحصل على اكثر من نصف أصوات النواب سيتم اختياره كعلم للعراق. اما في حالة عدم حصول أي علم على اكثر من نصف عدد الاصوات فان اللجنة ستقدم الاعلام الثلاثة الاحتياط للتصويت عليها.
التعليق:
بقت شغلة كلش مهمة وواردة ما محسبتلها اللجنة..وهي أنه اذا حتى الاعلام التلاثة الاحتياط هم ما راح يطلع منها واحد يحصل على اكثر من نص الاصوات..وهذا أمر كلش طبيعي يم برلمانه المبجل الي عنده الرفض والاختلاف والتمديد زلاطة..بهيجي حالة شنو راح يكون حل اللجنة..وكلشي ولا تكلولنا تعيدون المسابقة من جديد!!!.
رموز دينية طابو!!
الخبر:
أظهرت نتائج استطلاع للرأي أن أغلبية ساحقة من العراقيين يرفضون توظيف الرموز الدينية في الحملات الانتخابية، وذلك على بعد أسابيع من موعد إجراء انتخابات المحافظات في البلاد. ورفض أكثر من 90% من المستجوبين في الاستطلاع، الذي أجرته صحيفة الصباح أن تستعمل الأحزاب العراقية رموزا دينية في حملاتها الانتخابية.
التعليق:
هسه لو 101 % من الشعب العراقي يرفضون استخدام الرموز الدينية بالانتخابات هم الاحزاب المجلبة بعباية هاي الرموز راح يستخدموها بالانتخابات حتى يستغلوها ويستلمون بفضلها المناصب ويكعدون على الكراسي..مو حتى الرموز هم صرحت وكالت احنه لكل العراقيين..بس شنسوي للي ما عدهم شي يقدمو ويقنعون بي الناخبين ويكسبون اصواتهم غير أنه يسجلون الرموز الدينية طابو لقوائمهم!!!.
التخطيط..ضمير غائب!!
الخبر:
حذرت الشركة العامة للاتصالات والبريد الشركات الحكومية و الاهلية من انها ستتحمل تكلفة اصلاح الاضرار الناجمة عن اعمال الحفر التي تقوم بها خلال تنفيذها للمشاريع المختلفة. وأهاب مصدر مخول بالشركات ذات العلاقة مراجعة أقسام الاتصالات في بغداد والمحافظات للتنسيق معها في هذا الشأن تجنبا للوقوع بأية أخطاء في الحفر وذلك من خلال تزويدها بالخرائط والمخططات للشبكات الارضية للبدالات.
التعليق:
تره الشغلة مو بس يم الاتصالات..هي شابجة شبجة مو طبيعية..واليوم يبلطون الشارع..باجر يجي ابو المجاري يحفر ويدفن ويروح..وورا يجون اهل الاتصالات يحفرون الرصيف ويدفنو بالتراب ويروحون..ووراهم يجون جماعة المجاري يحفرون و( ما ) يدفنون ويديرون وجهم ويروحون الشارع لمسبح صيفي..اما لليكول ( لعد وين التخطيط ) نكول ( راح بشغلة وباجر يجي )!!!.
الاحد 9 تشرين الثاني 2008
أنصح نفسك!!
الخبر:
أكد وزير الداخلية جواد البولاني ان على منتسب الوزارة الالتزام بدوره كرجل قانون يحفظ أمن المواطن ويدافع عن الدستور والابتعاد على الولاءات الحزبية والمذهبية والتعصب القومي والديني، مؤكدا ان منتسبي وزارة الداخلية ابناء مؤسسة امنية مستقلة لا تقبل ان يكون للولاءات الحزبية والمذهبية والتعصب القومي والديني موقع في عقيدتها والتزامها الاخلاقي والمهني.
التعليق:
اذا ما تقبل أنه منتسب بوزارتك يكون اله ولاء حزبي لعد شلون تقبل الوزير..الي هو حضرة جنابك..يأسس حزب ويستغل منصبه حتى يدعم حزبه..مو خياس حزبك الدستوري كله طلع..وحصص التعيينات الي توزعها على شيوخ العشاير مقابل الانتماء لحزبك فاحت ريحتها!!!.
الاعتراف سيد الأدلة!!
الخبر:
أبدى عضو البرلمان عن جبهة التوافق ورئیس کتلة الحوار الوطنی خلف العلیان تحفظه على بند في الاتفاقية الأمنیة والذی یضم عبارة (فلول النظام السابق) ویصفهم کأعداء للشعب، مشیراً إلى نفسه قائلاً: أنا من فلول النظام السابق.
التعليق:
هاي ثاني مرة يعترف بيها الرفيق المناضل خلف العليان علنياً بأنه بعثي وصدامي..المرة الأولى بجلسة برلمانية وهسه هاي الثانية..ومثل ما يكولون الاعتراف سيد الأدلة..بعد شينتظر برلمانه حتى يرفع الحصانة عن العليان..لو عيب وزحمة من المصالحة!!!.
دك عيني دك!!
الخبر:
قال النائب عن كتلة التحالف الكردستاني عبد الخالق زنكنة إن هناك إجماعاً بين القوى السياسية على أن توقيع الاتفاقية الأمنية أفضل من تمديد التفويض الأممي الممنوح للقوات متعددة الجنسيات في العراق.
التعليق:
والله دخنه وحرنه بأمرنا..كل الكتل السياسية تصيح اجماع على حسب هواها من الاتفاقية الأمنية..بس من نرجع للتصريحات نشوف هذا الاجماع الي يسولفون عنه اختلاف حد العظم..لان التيار الصدري يكول اكو اجماع على رفض الاتفاقية..والتحالف الكردستاني يكول اكو اجماع على قبولها..والتوافق يكولون اكو اجماع على استمرار المفاوضات..والائتلاف مختلفين بيناتهم..وأدك على راسي..دك عيني دك!!!.
هز يا الهاشمي!!
الخبر:
قال رئيس مجلس إنقاذ الأنبار حميد الهايس أن أعضاء الحزب الإسلامي بعد أن أفلسوا سياسياً بمحافظة الأنبار فهم يخططون اليوم لإثارة التفرقة والنزاعات بين عشائر الأنبار لأجل كسب المزيد من التأييد من قبل الناخبين خلال انتخابات مجالس المحافظات المقبلة.
التعليق:
يعني الحزب الاسلامي بقيادة الكابتن طارق الهاشمي يتبع سياسة ( فرق تسد ) حتى يصعد على جتاف أهل الأنبار..بعد ما صعد بالمرة السابقة بفضل تحالفه ويه التنظيمات الارهابية الي خلته بس هو يشارك بالانتخابات..وبس أنت وحدك باللعب هز يلكمر شعر شعر!!!.
تعديلات الدستور بين حانه ومانه!!
الخبر:
أكد النائب عن جبهة التوافق عز الدين الدولة صعوبة التوصل إلى أي اتفاق حول تعديل الدستور على الأقل في الفصل التشريعي الحالي، مشيرا إلى أن كل التصريحات التي تؤكد حصول تقدم ملموس حول هذه المسالة هي تصريحات مبالغ فيها وغير دقيقة.
التعليق:
الجماعة بلجنة تعديل الدستور صايرين كل واحد يحود النار لكرصته..الي ما يريد تصير تعديلات يكول اللجنة كملت 99% من شغلها وراح ترفع التقرير النهائي وما باقي غير بس اختلافات على حروف الجر..والي عدهم اشكالات على الدستور سووها ظلمة ودليلها الله ومليوصة يا حجي عليوي..وبين حانه ومانه ضاعت تعديلاتنه!!!.
حاميها ارهابييها!!
الخبر:
قالت مسؤولة اللجنة الأمنية في المجلس المحلي لمحافظة ديالى إن غالبية المفصولين الـ 600 الذين أعيدوا إلى الخدمة في شرطة المحافظة هم من عناصر تنظيم القاعدة الارهابي ومتورطين بجرائم قتل وتهجير من بينهم عناصر خطيرة في التنظيم.
التعليق:
هي منا الأوضاع مضطربة بديالى..انوب وزارة الداخلية دخلت 600 إرهابي ويه الشرطة..يعني راح تصير حاميها حراميها..لا قيم الركاع بديره عفج!!!.
شجاي تسولف؟!
الخبر:
دعا خبير ومحلل اقتصادي الحكومة الى وضع حسابات ختامية للميزانية السنوية خلال الاشهر الاخيرة من كل عام، تتضمن الانفاق على المشاريع المنفذة والمبالغ المالية التي صرفت على المشاريع الاستثمارية فضلا عن التخصيصات المالية التي خصصت للقطاعات الحكومية وما صرف منها، لان لها اهمية كبرى في تحديد الميزانية المقبلة من خلال احتساب فائض الميزانية السابقة اضافة الى تحديد اماكن الخلل في القطاعات المنفذة للمشاريع ونسب التنفيذ والاموال التي صرفت.
التعليق:
عيني يلمحلل حلل بكيفك..بس تره محد يسمعك ولا تتوقع راح احد ياخذ بحجيك ويسوي الحسابات الختامية..لان هاي الحسابات اذا سووها راح تطلع فتوكهم كلها..ويبين كلشي وكلاشي من الخمط..واذا هي الحسابات الختامية مال موازنات كبل سنتين وتلاثة لحد الآن ما واصلات..تريد مال أخير 3 شهور يسووها!!!.
السبت 8 تشرين الثاني 2008
نائب بالمراسلة!!
الخبر:
صرح رئيس جبهة الحوار الوطني صالح المطلك أنه لا يملك أي معلومات عن التعديلات التي حددتها الحكومة العراقية على الاتفاقية الأمنية ولا رد الجانب الأمريكي حولها.
التعليق:
طبعاً ما تعرف أي شي عن الاتفاقية الأمنية وتصير مثل الهايشة أبـ بدي..اذا أنت كاعد بالأردن وما تجي لبغداد الا بالسنة مرة..يعني صاير نائب برلماني بالمراسلة!!!.
علاوي أبوالعطبه!!
الخبر:
اعلنت حركة الوفاق الوطني برئاسة اياد علاوي انها بدات بالتشاور مع قوى وشخصيات سياسية وعشائرية ودينية ومدنية ومنظمات مجتمع مدني والصحوات اوالاتحادات لاقامة تحالفات في مجالس المحافظات بعد اجراء الانتخابات.
التعليق:
صدك لو كال ابو المثل ( يحضر العطبة كبل الفشخة )..هسه انتو فوزو اول مرة بالانتخابات وحصلو مقاعد بمجالس المحافظات وبعدين تحالفو على راحتكم..لو علاوي راح لفتاح فال وكضمنله الفوز بالانتخابات!!!.
عبد اللطيف الخفيف!!
الخبر:
أعرب النائب المستقل وائل عبد اللطيف عن انتقاده لأداء السياسيين العراقيين في ما يتعلق بالاتفاقية الأمنية قيد التفاوض بين بغداد وواشنطن، متهماً إياهم بعدم الوضوح وإضاعة الكثير من الفرص.
التعليق:
شنو قصتك يبن عبد اللطيف..شو هلايام صاير كلش أخفيف وكل ساعة منتقد المفاوضات مال الاتفاقية الأمنية وتريد يوقوعها بسرعة وحتى لو على صكاطها..متفهمنه شبيك..مو حتى الامريكان مو مثلك مستعجلين..اثكل شويه!!!.
قانون لعب الجهال!!
الخبر:
كشف مقرر لجنة النفط والغاز في مجلس النواب النائب جابر خليفة جابر عن إن مجلس الوزراء سيقدم مسودة قانون النفط والغاز التي أقرت في شباط عام 2007 إلى مجلس النواب.
التعليق:
يعني هم ما سوينه شي اذا تقدمت المسودة الاصلية مال 2007..لان هي عليها مشاكل وطلايب وأكيد التحالف الكردستاني راح يرفضها وترجع من جديد لمجلس الوزراء..بعد عليمن مضيعة الوكت هاي..مو كافي القانون متأخر صارله سنة وعشر شهور..شوفولكم حل بدال لعب الجهال هذا!!!.
من عاشر البرلمان اربعين يوم!!
الخبر:
انسحبت كتلة الحزب الديمقراطي الكردستاني والأحزاب الإسلامية من جلسة برلمان إقليم كردستان وأعلنت مقاطعتها مناقشات البرلمان حول إقرار مشروع قانون الرعاية الاجتماعية وحقوق المرأة. يذكر بان البرلمان الكردستاني لم يشهد منذ تاسيسه منذ عام 1991 حالة انسحاب لاي كتلة برلمانية.
التعليق:
لازم نواب البرلمان الكردستاني انعدو من البرلمان العراقي وانصابو بنفس المرض الخبيث مال الانسحاب من الجلسات..مو صارلهم 17 سنة محد منسحب من أي جلسة..بس من عاشر قوم اربعين يوم كام ينسحب مثلهم!!!.
قاسم عطا..علل ما يأتي!!
الخبر:
أوضح المتحدث باسم خطة فرض القانون اللواء قاسم عطا أن هناك العديد من الأسباب التي جعلت الإرهابيين يزيدون من عملياتهم خلال الأيام الماضية منها أثبات الوجود ورفع الجانب المعنوي لديهم والتأثير على بعض الملفات التي أحرزت تقدما كبيرا منها ملف عودة العوائل المهجرة، وملف المتطوعين، وملف المصالحة الوطنية.
التعليق:
احنه ما نريد أسباب وتنظير وتعليل..نريد علاج للتحول السلبي بالوضع الامني..تره الاعمال الارهابية جاي تزيد يوم وره يوم..فلا تاخذكم العزه بالاثم وتبقون تكابرون وتستندون على التحسن الي صار بالفترة الراحت..واذا ذيج المرة شديتو حزام هسه ينرادلكم حزامين!!!.
بقت على هاي!!
الخبر:
أقرت وزارة التجارة بعجزها عن سد احتياجات السوق من المواد الإنشائية عازية ذلك إلى فقدان القدرة على توقيع تعاقدات جديدة لتوريد الموارد الإنشائية.
التعليق:
على اساس وزارة التجارة فاتكه اليمني اببقية الشغلات وما باقي غير بس المواد الانشائية..هو انتو بقيادة الوزير الفلتة عبد الفلاح السوداني ( سود الله وجهه ) بكل شي فاشلين..بس المصيبة الوزير لاطش لطشة مو طبيعية ومحد يكدر يغيره!!!.
الجمعة 7 تشرين الثاني 2008
كشكول الجمعة
حدث الأسبوع/
يقال في الامثال الشعبية ( أتعب وألعب )، ولكن برلماننا العتيد ولجانه ( التعبانة ) دائماً ما تقضي الفترات المقررة لتادية اعمالها لعب × لعب ( ويتوازون بالأخير ويكومون يلوصون ويتجاوزون على الدستور )، والدليل ما صرح به مصدر برلماني من ان هناك توجه نحو الاستفتاء على التعديلات الدستورية المتفق عليها وتأجيل المختلف عليها. وهذا الأمر يعتبر تجاوز على المادة 142 بالدستور التي تنص على الاستفتاء على التعديل دفعة واحدة.
فلم الجمعة/
أنتج وزير التجارة عبد الفلاح السوداني الجزء الرابع من فلم ( فضيحة السوداني ). والجزء الجديد من الفلم يدور حول فضيحة الشاي الذي وزع في الناصرية على أنه سريلانكي المنشأ، في حين توجد في داخل العبوات كارتات تشير الى أنه ( ايراني المنشأ ) وتم رفضه سابقاً لمخالفته المواصفات. يذكر ان أحداث الأجزاء الثلاثة كانت تدور حول اكتشاف مواد غير صالحة للاستهلاك البشري وزعت ضمن مفردات البطاقة التموينية في بابل وكربلاء ونينوى!.
عجيب أمور غريب قضية/
في قرار غريب عجيب ويخالف أنظمة وشرائع كل دول العالم بما فيها اقليم دارفور، قررت وزارة التعليم العالي في اقليم كردستان قبول ابناء المسؤوليين الحكوميين و الحزبيين من كردستان في الكليات الطبية بغض النظر عن شرط المعدل..وهنيالنه بدكاترة المستقبل!.
بدون تعليق/
أصدرت وزارة التخطيط والتعاون الإنمائي إحصائية تؤكد وجود مليون أرملة في العراق تتقاضى 83 ألف فقط منهن رواتب من شبكة الحماية الاجتماعية والبالغة 65 ألف دينار شهرياً!.
بالباكيت/
وزير الاتصالات الجديد فاروق عبد القادر حول مقر إقامته في فندق الرشيد إلى مكتب خاص لتمشية أمور الوزارة، كونه لم يحضر إلى مقر الوزارة منذ تسلمه المنصب، وسلم ( الصاية والصرماية ) لمستشارته الفنية التي تمسك بزمام كافة الأمور و( تمشيها بكيفها )!.
يقال/
يقال والعهدة على رئيس هيئة النزاهة رحيم حاسن العكيلي بأن الهيئة ما تزال غير محصنة سياسياً، وتتعرض لسلسلة من الضغوط من قبل أحزاب وقوى وتنظيمات سياسية توفر لمرتكبي جرائم الفساد الغطاء المطلوب، الامر الذي يعرقل عملها في تكريس القانون ومكافحة آفة الفساد المستشرية في مختلف الدوائر والأجهزة الحكومية.
صدق و لا تصدق/
صدق ان وزير الداخلية السوري قد صرح بان الوضع الامني في العراق هم تشعر به سوريا، وانها توءمن ان استقرار العراق هو استقرار لها .. ولا تصدق بهذا التصريح مطلقاً والدليل هو سحب الحكومة السورية لقواتها من على الحدود العراقية لفتح الباب على مصراعيه امام الارهابيين الذين تأويهم سوريا الأسد!.
تدرون لو ما تدرون؟/
تدرون أنه مدير كمارك المنطقة الغربية حجز 340 كن من مادة الكلور المستوردة لوزارة البلديات ورفض ادخال الشحنة الا بعد استلام رشوة مقدارها 20 مليون دينار..وعلى عينك يا تاجر!.
واي واي/
أصدرت محكمة بغداد الكرخ مذكرات اعتقال بحق مئة من ضباط ومنتسبي شرطة محافظة الأنبار بتهمة ارتكاب جرائم..وصدك لو كال ابو المثل ( حاميها حراميها )!.
سري وشخصي/
قال المتحدث باسم جهاز المخابرات أنه ليس من حق أحمد الجلبي التدخل في موقع ليس من اختصاصه ومساءلة جهاز المخابرات، فهو ليس عضواً في البرلمان ولا يملك اي منصب حكومي، لذلك عليه ان لا يحشر نفسه في أمور ليست من اختصاصه!.
سين سؤال؟/
س/ من هو النائب ( المحترك كلبه ) على حقوق الطرف الأمريكي في الاتفاقية الأمنية أكثر من حقوق الطرف العراقي؟
جـ / أنه حضرة السيد النائب المستر وائل عبد اللطيف!.
الخميس 6 تشرين الثاني 2008
النفط والغاز قسمة ونصيب!!
الخبر:
ارتفعت داخل مجلس النواب الدعوات المطالبة بالإسراع بتشريع قانون النفط والغاز الذي ما زال موضع جدل بين الأطراف العراقية المشاركة في الحكومة.
التعليق:
الظاهر أنه قانون النفط والغاز راح يصير مرض مزمن او مستعصي محد يكدر يشوفله حل..لا صارلة سنة و8 شهور..يعني 20 شهر بالتمام والكمال متخمر يم الحكومة والبرلمان وما شايفين حل اله..يمعودين روحو يم كشافة لو فتاح فال وشوفو ليش واكفة قسمته!!!.
مقاومة الصراصر!!
الخبر:
أفاد مصدر في قوات شرطة محافظة البصرة بأن مفارز أمنية تابعة لوزارة الداخلية عثرت على كمية من الأعتدة والمتفجرات مخبأة داخل شبكة لتصريف المجاري في منزل وسط المدينة.
التعليق:
مو كلنالكم الارهابيين والميليشيات صارو جريذية وكامو يختلون بالمجاري من وره الدك المستمر من قواتنه الامنية على روسهم..وهذا دليل اكيد على تحول ( جهادهم ) لمقاومة الصراصر!!!.
وشنو الفايدة!!
الخبر:
تلقت هيئة النزاهة العامة منذ بداية السنة الحالية أكثر من 26 ألف إخبار بشأن قضايا فساد. بحسب بيان أصدرته الهيئة.
التعليق:
مو المهم عدد الاخباريات..المهم النتيجة الي توصلت الها الهيئة من هاي الستة وعشرين الف قضية فساد..احنه متاكدين انه ما كملت تحقيقاتها ودانت اشخاص بستة وعشرين قضية من بين ذني..والسبب طبعاً تستر الحيتان الكبار على الحرامية الزغار..والقوانين الجبارة الي تمنع محاسبة المسؤولين الا بموافقة الحرامي الجبير السيد الوزير!!!.
حماية لنسيب ابن خالة زوج اخت الوزير!!
الخبر:
قرر مجلس الوزراء تخصيص أفراد حماية للمسؤولين الحاليين والسابقين والشخصيات والأحزاب عن طريق المديرية العامة لحماية الشخصيات التابعة لوزارة الداخلية مع تخصيص أفواج الحماية الخاصة بالرئاسات الثلات من قبل وزارة الدفاع.
التعليق:
هذا كلش خوش قرار..لان كل مسؤول سواله ميليشيا خاصة بي بحجة الحماية..وهسه نتمنى من مديرية حماية الشخصيات ان تخلي بحسابه تحسن الوضع الامني ودرجة اهمية المسؤول لمن تخصص اعداد الحماية..مو اكو بعض السادة المسؤولين ( حفظهم الله ورعاهم ) كلش خرقوها وكامو يخصصون افواج لحمايتهم..هذا عدا تخصيص حماية لفراش الوزارة الفلانية لان يصير نسيب ابن خالة زوج اخت الوزير..لذلك يعتبر مستهدف!!!.
كلية طب العرب والاعشاب!!
الخبر:
اضرب طلاب الكليات والمعاهد في إقليم كردستان عن الدوام احتجاجا على قرار وزير التعليم العالي بقبول عدد من أولاد مسؤوليين حكوميين و حزبيين من كردستان في الكليات الطبية ممن درجاتهم من دون المعدل المطلوب للقبول في هذه الكليات.
التعليق:
ها يابه رجعنه لايام زمان لمن جان الطالب الي معدله 70 يصير معدله فوك الميه لان ابن صديق الريس وامه عدها شارة الحزب وهو عضو بالحزب..وبعدين اذا السادة المسؤولين يريدون يصيحولهم ابو الدكتور..جان تابعوهم بدراستهم..مو بعدين يريدون يدخلوهم كليات طب وهمه معدلاتهم ما تدخلهم طب العرب والاعشاب!!!.
انجاز جديد للسوداني!!
الخبر:
طالب مجلس محافظة ذي قار بفتح تحقيق حول مادة الشاي التي تم توزيعها حاليا ضمن الحصة التموينية والتي من المفترض ان تكون ذات المنشأ (السيرلانكي) في حين عثر على كارتات موجودة داخل الاكياس الموزعة مكتوب عليها ان هذه المادة من (انتاج جمهورية ايران). وان مثل هذه النوعية قد تم رفضها سابقا الا انه يبدو تم اعادة تعبئتها بهذها الاكياس ووزعت ضمن الحصة التموينية.
التعليق:
الظاهر منجزات وزارة عبد الفلاح السوداني ما راح تخلص..لان وره فضيحة الحليب الغير صالح للاستهلاك البشري بكربلاء وبابل وفضيحة المواد الغذائية التالفة بالموصل..والي توزعت ضمن الحصة التموينية..هسه طلعت فضيحة الجاي بالناصرية..يا مجلس النواب شوكت بعد تهتز الشوارب وتحاسبون هذا الوزير الفطحل!!!.
وزير النوم والمخدات!!
الخبر:
قالت مصادر في وزارة الاتصالات ان الوزير الجديد فاروق عبد القادر لم يحضر الى مقر الوزارة لحد الان، ويتابع عمل الوزارة من خلال مقر اقامته في فندق الرشيد، وكلف المستشارة الفنية بتمشية امور الوزارة.
التعليق:
يعني بالمختصر المفيد الاستاد صاير وزير مع وقف التنفيذ..أو وزير بس بالاسم ومسلم لحيته ومصير الوزارة كلها بيد موظفة..لعد شكو خلوك وزير عيني اذا لازك بالفندق..تره انت وزير الاتصالات مو وزير النوم والمخدات!!!.
الاربعاء 5 تشرين الثاني 2008
ذب القلم وأنتبه علصبورة!!
الخبر:
ذكر النائب عن القائمة العراقية اسامة النجيفي ان مباحثات الحكومة المتعلقة بمبادئ الاتفاقية الامنية التي تعتزم توقيعها مع واشنطن والتعديلات التي أجريت عليها أنحسرت بالقوى المشاركة بالحكومة فقط وان القائمة العراقية لم تشترك في المباحثات ولم تطلع على التفاصيل.
التعليق:
شلون القائمة العراقية ما شاركت بمباحثات الاتفاقية الامنية وتعديلاتها وما مطلعة على التفاصيل..لعد رئيس القائمة اياد علاوي مو شارك باجتماعات المجلس السياسي للامن الوطني الخاصة بالاتفاقية..لو ما جان منتبه وباله يم غير شي..منا وهيج خلي علاوي بالاجتماعات يذب القلم وينتبه علصبورة!!!.
فشله من العيب!!
الخبر:
قال مصدر مسؤول في وزارة المالية إن الديون الخليجية المترتبة على العراق لم تطفأ لحد الآن لأسباب سياسية حيث أثمرت جهودهما بالأربع سنوات الماضية عن إطفاء ديون العراق ضمن شروط دول نادي باريس والبالغة 140 مليار دولار، ولم يتبق سوى ديون السعودية والكويت وقطر.
التعليق:
مع الاسف هاتي الدول جاي تخضع لجهات سلفية مسيطرة على قراراتها..لان التغير الايجابي بالعلاقات الدبلوماسية وفتح السفارات بالعراق ما عجب الجماعات التكفيرية الموجودة بهاي الدول وكامت تضغط على حكوماتها حتى يبقى ملف الديون حجر عثرة بالعلاقات الجديدة..تره كلش فشله من العيب كل دول العالم سقطت ديونها وبقت بس الدول (الشقيـــــــــــــــــــــــــــــــــــــــــــــــقة)!!!.
شلون تحلب الثور كاكه؟!
الخبر:
قال مسؤول العلاقات الخارجية في الحزب سفين دزئي ان رئيس اقليم كردستان مسعود بارزاني لم يتجاوز صلاحياته عند تصريحه في واشنطن حول الموافقة على اقامة قواعد امريكية في الاقليم، حيث فضّل توضيح مواقف القيادات الكردية بعد ان تشاور مع نواب البرلمان الكردستاني والاحزاب السياسية.
التعليق:
وهو شنو علاقة البرلمان الكردستاني والاحزاب السياسية والقيادات الكردية بهذا الموضوع الي من اختصاص الحكومة المركزية فقط..موحتى جلال طلباني ومحمود عثمان اكدو هذا الشي..وصدك لو كال ابو المثل ( اكله ثور .. يكول احلبه )!!!.
لجنة الدستور تخالف الدستور!!
الخبر:
قال مصدر برلماني انهناك توجه نحو الاستفتاء على التعديلات الدستورية المتفق عليها وتأجيل المختلف عليها.
التعليق:
أولاً المواد المختلفين عليها تمثل جوهر التعديلات وهي ( قانون النفط والغاز والمادة 140 وقانون المياه وصلاحيات الاقليم..يعني بدون الاتفاق على ذني كانك يابو زيد ما غزيت..وثاني شي الاستفتاء على قسم وترك قسم ثاني مخالف للمادة 142 بالدستور الي تنص على التعديل دفعة وحدة..وثالثاً كافي اجتهادات تعبانة وكملو شغلكم و(رحم الله امرء عمل عمل فاتقنه)..ولو لحد الان ماكو لجنة برلمانية كملت شغلها!!!.
على يا فزاعات تسولف؟!
الخبر:
أكد النائب عن كتلة الائتلاف حميد معلة أن الكتلة وان صوتت الى جانب قرار البرلمان بتعديل البند المتعلق بحصص الأقليات، الا انها تركت حرية التصويت لنوابها حول المقترحات.
التعليق:
هاي عليمن تريد تعبرها معلة..ليش هو اكو نائب من نوابكم يصوت بكيفه اذا ما مستلم باص كبل بساع عليمن يصوت..لو من شفتوها علكت وطلعتو بالوجه المصخم كدام الاقليات ذبيتوها براس النواب..ليش همه فزاعاتكم يكدرون يهشون لو ينشون اذا ما تجيهم اوامر عليا!!!.
اتحاد المجادية واللكامة العرب!!
الخبر:
أعلن الاتحاد العام للأدباء والكتاب العرب رفضه انضمام العراق إلى الاتحاد، معتبراً أن الثقافة العربية ليست استثناء عن الوضع العربي العام الذي لا يعيش أبهى عصوره.
التعليق:
طبعا الوضع العربي بانكس عصوره من وجهة نظركم..لان راح حامي البوابة الشرقية وايامه الي جانت تهل على روسكم منه كوبونات النفط ودفاتر الدولارات والمارسيدسات حتى تسبحون بحمد قائد الحفرة..وبعدين انتو هسه خليتو نفسكم استثناء من الوضع العربي..لان الدول العربية كلها انفتحت على العراق ورجعت لحضن بغداد وبدت تفتح سفاراتها وتزورها وفود رسمية منها..واتحادكم الي لازم تسموه ( اتحاد المجادية واللكامة العرب ) هم ما ينراد!!!.
اعتراض عراقي على كاس العالم بالفساد الاداري!!
الخبر:
صدر مؤخراً بيان عن هيئة النزاهة أكد انخفاض نسبة الفساد الإداري والمالي في البلاد قياساً بالعامين السابقين.
التعليق:
يمعودين كولو غيرها..هذا يا انخفاض التسولفون عنه..مو صرنه ابطال العالم بالفساد..واخر تقرير لمنظمة الشفافية الدولية صنفنه بالمركز الثاني بين الدول..واكو معلومات تكول أنه تماسيح الفساد ما عاجتهم هاي النتيجة ويكولون اكو تحيز من الحكم وهسه راح يقدمون اعتراض حتى ينطونه المركز الاول..حدث العاقل بما لا يليق فان صدق فلا عقل له!!!.