قارئة الفنجان الحجية أم فلان!!

 جاي اشوفن حزب يحجي شيش بيش *يكتل المدني والشرطة وحتى الجيش *يدعي لاجل العراقيين يعيش * تنسحب اعضائة منه وراح يتفلش تفليش * اسمه جبهة التوافق وينتهي وينطش طشيش !!!

 والله اشوفن هالشعب يشكي الحرارة * ماكو امبير كهرباء وماكو جارة  * وماكو اي حل حتى نبقى بانتظارة * وحتى وزير الكهرباء يكول شعليهة الوزارة * عام مليون الوضع ياخذ استقرارة !!!

 جاي احس الناس مشغولة بعلم *دايخة بتغييرة كللهة بحجة سواه الصنم * شالوا النجمات وكالوا لاميكفينة النجم * انريد تغييرة شلع حتى ابد ماكو ندم * الالوان تظل بنقاش والشكل ماينحسم !!!

 وي وي وي وي سمر ناسين التواضع * بس ينقدون الحكومة ماتخلينا بمواقع * لاوزير ولاعضو ولاحضينا بشي واقع * بالاصل همهم يدورون المنافع * معروفة كل هاي الدوافع * وللابد باقين هيج ومايغيرون الطبائع !!!

 واخ من المدفعية منصوبة وبس ترمي رمي * احمدي نجاتي كلهه ارمي يلله وداومي * عالقرى تبقى تدك ومااضنهة تنحمي * عين الشافتهة كالوا لازم هي تنعمي * ماكو اي حل للجوار ويلله بقتلنة ساهمي !!!

 ياويلي القاعدة والله كلله انتهت * خارج اسوار العراق اليوم هي اتوجهت * وين راحوا وزرائج شو ولج كلهة انتهت * لادفاع ولازراعة شو لعد كلهة صفت * بس اسامي ومن توفت الناس كلهة هلهلت !!!

 قادة ملتمين بحزب والله غبي * اسمة جان حزب البعث العربي * بس شعارات وهتافات والشعب سابيه سبي * اعتقالات وقتل طفل او شيخ او صبي * يصفى بالخارج يجدي يصيح بثواب النبي * راح يتغير اسمة ويصير حزب المجادية العربي !!!

ولك كدامي ديالى ردت احسن من زمان * بشاير الخير العظيمة رجعت والله الامان * تكدر تروح وتجي انته هسة لاي مكان * والحكومة تصدر بيهة اجمل بيان * انتهى الارهاب وولى *  والنصر علنوا اعلان !!!